धनकुटा । १५ औं संस्करणको सहिद भीमनारायण गोल्डकपको उपाधी क्षमादेवी प्लानिङ ब्वाइज क्लव काठमाडौंले जितेको छ । धनकुटा सदरमुकाम स्थित तल्लो टुँडिखेलमा सम्पन्न फाइनल खेलमा वीरगञ्ज युनाइटेड क्लवलाई ४–० गोलअन्तरले पराजित गर्दै प्लानिङ ब्वाइजले उपाधी जितेको हो ।
मंगलबारको लागि तय भएको फाइनल भारी वर्षाका कारण हुन नसकेपछि बुधबार भएको हो ।
उपाधीसँगै प्लानिङ ब्वाइजले नगद ५ लाख रुपैया सहित भीमनारायण गोल्डकपको ट्रफी हात पार्यो । भने उपविजेता वनेको विरगञ्ज यूनाइटेडले २ लाख ५० हजार सहित ट्रफिमा चित्त वुझायो । प्लानिङ ब्वाइजको जितमा यो निपोलियनले २, समिर थापा र विशाल दर्जीले १÷१ गोल गरेका थिए । फाइनल खेलको म्यान अफ द म्याच विजेता टिमका अभिनास थापा मगर घोषित भए । उनले नगद ४ हजार रुपैया हात पारे । त्यस्तै विजेता टिमका विशाल दर्जी उत्कृष्ट रक्षक, उत्कृष्ट गोलकिपर लोकेश चौधरी, उत्कृष्ट स्टाइकर यो निपोलियन र सचिन्द्र धिमाल उत्कृष्ट प्रशिक्षक घोषित भए भने वीरगञ्जका उमेश कार्की उत्कृष्ट मिडफिल्डर घोषित भए । उनीहरुले ७/७ हजार नगद र ट्रफी हात पारे । प्रतियोगिताको सर्वोत्कृष्ट खेलाडी प्लानिङ ब्वाइजका डेडी वाम्वा घोषित भए । उनले नगद १५ हजार र ट्रफी प्राप्त गरे ।
खेलाडी पुरस्कार एन्फाका उपाध्यक्ष तथा एएफसी सामाजिक उत्तरदायी समितिका सदस्य दावा लामा, पाख्रिवास नगरपालिकाका नगर प्रमुख ज्ञानवहादुर गुरुङ लगायतले पुरस्कार वितरण गरेका थिए । सहिद भीमनारायण श्रेष्ठ स्मृति प्रतिष्ठानले आयोजना गरेको प्रतियोगिता गत वैशाख २७ गते शुरु भएको थियो ।
२०५५ सालमा स्थापित गोल्डकप सुरुका दुईवर्ष नियमित रुपमा सञ्चालन भएको थियो । त्यसपछि देशको तत्कालीन असहज परिस्थितका कारण सञ्चालन हुन सकेन ।२०६३ सालपछि गोल्डकप बर्षेनी सञ्चालन हुँदै आइरहेको छ । २०५५ सालमा धनकुटा नगरपालिका वडा नं. ६ का तत्कालीन् वडाध्यक्ष राजेश्वर वहादुर श्रेष्ठले प्रतियोगिताको सुरुवात गरेका हुन् । नेपाल कांग्रेसका नेता शहीद भीमनारायण श्रेष्ठलाई विराटनगरमा राजा विरेन्द्रलाई बम हानेको आरोपमा पक्राउ गरि २०३५ सालमा तत्कालिन सरकारले गोली हानी हत्या गरेको थियो । उनलाई तत्कालीन् सरकारले २०७३ सालमा राष्ट्रिय सहिद घोषणा गरेको थियो ।
