धनकुटा । जिल्ला आयोजना कार्यान्वयन ईकाई (अनुदान व्यवस्थापन तथा स्थानीय पूर्वाधार) धनकुटाले भुकम्प पीडित लाभग्राहीहरुको गुनासो सुन्न जिल्लाका दुई स्थानमा सार्वजनिक सुनुवाई कार्यक्रम आयोजना गरेको छ ।
खाल्सा मिडिया रिसर्च सेन्टर धनकुटाको सहजीकरणमा महालक्ष्मी नगरपालिका केन्द्र जीतपुर र चौविसे गाउँपालिका केन्द्र राजारानीमा सार्वजनिक सुनुवाई कार्यक्रम आयोजना गरिएको हो ।
असार १७ गते मंगलवार महालक्ष्मी नगरपालिकाको सभाहलमा सम्पन्न सार्वजनिक सुनुवाई कार्यक्रममा नगरक्षेत्रका विभिन्न वडावाट सहभागी भएका डेढ सय भन्दा वढी भुकम्प पीडित लाभग्राहीले गुनासो तथा जिज्ञासा राखेका थिए ।
अधिंकाशं लाभग्राहीले घर बनाएको लामो समय वित्दापनि तेस्रो किस्ता नपाएको, अझै सम्म पनि पहिलो किस्ता नपाएको, भुकम्पले घर भत्किएपनि राहत नपाएको लगायत गुनासा राखेका थिए ।
सहभागीको प्रश्न तथा जिज्ञासाको उत्तर दिँदै जिल्ला आयोजना कार्यान्वयन ईकाई (अनुदान व्यस्थापन तथा स्थानीय पूर्वाधार) धनकुटाका निमित्त आयोजना प्रमुख थिरेन्द्र दाहालले लाभग्राहीको नामावलीमा सूची दर्ता गर्न छुट भए केही दिनको समयसीमा रहेकोले पूनः गर्दा गराउन, तेस्रो किस्ताको लागि सबै कागजात पठाई सकेकोले चाडैं रकम भुक्तानी हुने लगायत कुरा राखेका थिए ।
कार्यक्रममा जिल्ला समन्वय समिति धनकुटाका प्रमुख टंक चौहान, महालक्ष्मी नगरपालिका प्रमुख पर्शुराम नेपाल, डिएलपिआइयू धनकुटाका डिएसई शैलेश पोखे्रल, आयोजक प्रमुख थिरेन्द्र दाहाल, महालक्ष्मी नगरपालिका–२ का वडाध्यक्ष धुव्रराज राय, ७ का वडाध्यक्ष रुद्र तुम्बा, ८ का वडाध्यक्ष रामबहादुर खड्का लगायतले मन्तव्य राखेका थिए ।
कार्यक्रमको सहजीकरण खाल्सा मिडिया रिसर्च सेन्टरका कार्यक्रम संयोजक हरिबहादुर लम्जेल र संचालन सहजकर्ता कविराज घिमिरेले गरेका थिए ।
त्यस्तै असार १९ गते विहिवार चौविसे गाउँपालिकाको सभाहलमा सार्वजनिक सुनुवाई कार्यक्रम सम्पन्न भएको थियो । सो कार्यक्रममा १ सय २० भन्दा भुकम्प पीडित लाभग्राहीको सहभागीता थियो । लाभग्राहीले राखेको प्रश्न तथा गुनासोको आयोजना प्रमुख थिरेन्द्र दाहाल, डिएलपिआइयू धनकुटाका डिएसई शैलेश पोखे्रल लगायतका उत्तर दिएका थिए ।
कार्यक्रममा १ नं. प्रदेश सभा सदस्य माननीय निरनकुमार राई, जिल्ला समन्वय समिति धनकुटाका प्रमुख टंक चौहान, चौविसे गाउँपालिका अध्यक्ष खजिन्द्र राई, उपाध्यक्ष
यज्ञकुमारी रुचाल, चौविसे गाउँपालिका–१ का वडाध्यक्ष श्रीकृष्ण श्रेष्ठ, ७ नं. वडाध्यक्ष दुर्गा प्रसाद सुवेदी लगायतले मन्तव्य राखेका थिए ।