धनकुटा १४ चैत्र । नेपाल सरकारले विश्वभर फैलिदै गएको कोरोना भाईरसलाई फैलिन नदिई नियन्त्रण गर्न लकडाउन गरेको छ । यो समयमा दैनिक उपभोग्य सामग्रीहरुको आपूर्ति सहज समस्या भएको छ । यसलाई व्यवस्थित गरी उपभोक्ताहरुलाई सहज रुपमा विक्री वितरण के कसरी गर्न सकिन्छ भनि आज धनकुटा उद्योग वाणिज्य संघका पदाधिकारी र प्रमुख जिल्ला अधिकारी वीच जिल्ला प्रशासन कार्यालयमा भएको छलफल भएको छ ।
सरकारले लकडाउन गरेको समयमा अत्यावश्यक दैनिक उपभोग्य सामग्रीहरु खरिद गर्नका लागि दूध गाडी, खाद्यान्न पसल, औषधि पसललगायतका दैनिक उपभोग्य समाग्रीहरुका पसल खुल्ला गरी खरिद गर्न आवातजावत गर्न भने छुट दिएको छ । तर, बाहिरबाट आयात गर्नका लागी ढुवानी गर्नका अत्यावश्यक सामग्रीहरु बोकेका सवारी साधनहरुलाई निर्वाध रुपमा संचालन गर्न दिने र खरिद गर्ने उपभोक्ताहरुले भिडभाड नगर्ने गरी व्यवस्था मिलाउने सम्बन्धमा छलफल भएको धनकुटा उद्योग वाणिज्य संघको अध्यक्ष विजयसन्तोषी राईले जानकारी दिए ।
सो अवसरमा संघका अध्यक्ष विजयसन्तोषी राई र महासचिव रामबहादुर गोङ्वा लगायतका पदाधिकारीहरुले जिल्लामा रहेको विद्यमान दैनिक उपभोग्य सामग्रीहरुको अवस्थाको वारेमा प्रमुख जिल्ला अधिकारी केशवप्रसाद बिमली र सूचना अधिकारी जयराम श्रेष्ठलाई जानकारी गराएका छन् । संघका पदाधिकारीहरुले दैनिक उपभोग्य सामग्रीहरु लगायतका अतिआवश्यक वस्तुहरु ढुवानी गर्न र विक्री वितरणका लागी सहज वातावरण बनाईदिन आग्रह गरेका छन् । प्रजिअ विमलीले संघको आग्रहलाई प्रशासनले सहयोगगर्ने बताएको संघका अध्यक्ष राईले जानकारी दिए ।
